Tetë vende të BE-së krijojnë koalicion për përgatitjen ndaj sfidave të ardhshme

Tetë vende anëtare të Bashkimit Europian shpallën të enjten krijimin e një "koalicioni" për përgatitjen ndaj krizave me të cilat vendet e tyre po përballen, duke kërkuar veprim urgjent dhe të bashkërenduar në nivel europian për të rritur qëndrueshmërinë ndaj katastrofave natyrore dhe atyre të shkaktuara nga njeriu.

Përgatitja ndaj krizave është aktualisht kompetencë kombëtare brenda BE-së, por Belgjika, Estonia, Finlanda, Letonia, Lituania, Luksemburgu, Holanda dhe Suedia kërkuan në një deklaratë që të ketë bashkëpunim më të ngushtë ndërmjet vendeve anëtare dhe institucioneve të BE-së, duke theksuar se "krizat janë gjithnjë e më shpesh ndërkufitare, ndërsektoriale dhe gjithnjë më komplekse".

Ministri suedez për Mbrojtjen Civile, Carl-Oskar Bohlin, paralajmëroi: “Rusia po ndërmerr veprime destabilizuese që mund të prekin të gjitha shtetet anëtare.”

OKB shpërndan ndihma humanitare në Gaza pas lehtësimit të bllokadës nga Izraeli

Më shumë se 90 kamionë me ndihma humanitare janë shpërndarë nga ekipet e OKB-së brenda Rripit të Gazës, tre ditë pasi Izraeli lejoi futjen e ndihmave humanitare, pas një pezullimi që zgjati 11 javë.

Ndihmat, që përfshijnë miell, ushqim për foshnja dhe pajisje mjekësore, u morën nga pika kufitare Kerem Shalom të mërkurën në mbrëmje dhe u dërguan në magazina për shpërndarje. Të enjten, disa furra filluan prodhimin e bukës me miellin e ardhur.

OKB-ja bëri të ditur se shpërndarja e ndihmave është vonuar për shkak të mungesës së sigurisë përgjatë korridorit të vetëm të miratuar nga ushtria izraelite. Megjithatë, OKB theksoi se “këto ndihma janë shumë larg nga ajo që nevojitet për të përballuar krizën humanitare në Gaza”.

Gjykata Kushtetuese e Italisë njeh dy nëna në certifikatën e lindjes së fëmijës

Gjykata Kushtetuese e Italisë ka vendosur se dy gra mund të regjistrohen ligjërisht si prindër të një fëmije në certifikatën e lindjes, duke theksuar se e drejta prindërore nuk mund të kufizohet vetëm tek nëna biologjike në familjet me prindër të të njëjtit seks.

Gjykata vendosi se ishte antikushtetuese që regjistruesit civilë të refuzonin njohjen ligjore të fëmijëve të lindur nga çifte të së njëjtës gjini, duke përjashtuar partneren që ka dhënë pëlqimin për shtatzëninë dhe ka marrë përgjegjësitë prindërore.

Aktivistët për të drejtat e komunitetit LGBTQ+ e kanë cilësuar këtë si një "ditë historike për të drejtat civile në Itali".

Eurodeputetët kërkojnë ndërprerjen e plotë të fondeve të BE-së për Hungarinë

Eurodeputetë nga katër grupime kryesore politike në Parlamentin Europian – kristiandemokratë, socialdemokratë, liberalë dhe të gjelbër – i kanë bërë thirrje urgjente Komisionit Europian që të ndalojë plotësisht financimin e Hungarisë nga fondet e unionit.

Në një letër të përbashkët, europarlamentarët kërkojnë “pezullimin përfundimtar” të të gjitha fondeve për Hungarinë, duke theksuar se sanksionet e mëparshme nuk kanë sjellë rezultate konkrete për demokracinë dhe sundimin e ligjit në vend.

Këto kërkesa janë pasojë e një sërë veprimesh dhe ligjesh nga qeveria hungareze që, sipas kritikëve, minojnë pavarësinë e gjyqësorit, lirinë e medias dhe shoqërinë civile.